“روح بص على أخوك اللي عمره ما سقط في ولا مادة”، “روح شوف ابن عمك اللي أحسن منك”، “روحي شوفي مريم اللي معاكي في الفصل”، “شوفي بنت عماد اللي جنبنا لا بنسمعلها حِس ولا عامله قلق لحد”!
دي أمثلة بسيطة جدًا لجُمل كِتير جداً تَصدر من الوالدين (بصوت عالي قليلاً) مُوجهة مباشرة إلى ضمير أحد أبنائهم، بدافع الحب غالباً، وبغرض استفزازهم بنماذج ناجحة (من وجهة نظرهم) في جانب ما في الحياة، عشماً وإيماناً أن العيال هَتِغير من الناس دي وتكون زيهم وأحسن!
“من الحب ما قتل”
المقارنة واحدة من أشهر الطرق الخاطئة في التربية، حتى لو بدافع كويس جدًا، والحقيقة الصادمة إن في الغالب الموضوع ده بيجيب نتيجة عكسية، ورغم إن دي طريقة بتوجعنا كلنا وبتجيب نتيجة عكسية، لكن مكملين وبنفضل نعملها!
لمعرفة أحدث وأفضل طرق التربية الإيجابية الأكثر فاعلية
اشترك فى كورس التربية الإيجابية و التربية الإيجابية ٢.
إيه اللي بيحصل عند ولادنا لما بنقارن بينهم وبين حد؟
- المقارنة رسالة غير مباشرة لرفض ابنك أو بنتك فبيحسوا بالرفض وعدم القبول منكم.
- الغيظ والغضب من والديهم.
- الإحساس بالفشل والإحباط.
- الحقد والحسد والكراهية للشخص اللي بيتقارن بيه “وممكن كمان الأذى”.
ممكن حد يقول بس أنا عملت كده ونجح مع ابني، للأسف مضطر أصدمك وأقولك إن ده بنسبة كبيرة دمره بشكل ما، لأن الهدف كان عند ابنك هو إنه يكون زي أو أفضل من الشخص ده مش إنه يكون هو شخص ناجح، والفرق كبير بين الإتنين، الحاجة التانية غالباً هو ضغط نفسه علشان يكون أفضل ويرضيك في منطقة مش محببه ليه، وهيتصدم بعد عُمرٍ طويل إنه مش في مكانه، أو هيفضل مكمل لكن في منطقه لا بيبدع فيها ولا بيدي كل طاقته ليها!
لو انت ابن/ابنة:
١- اعرف نفسك كويس، مميزاتك والحاجات اللي انت شاطر فيها، اعرف نوع شخصيتك والذكاءات اللي انت شاطر فيها .. ده هيساعدك كتير، لو مش عارف اسأل الناس اللي حواليك.
٢- صدق إنك مُميز ومُختلف في حاجات مُعينة عن كل اللي حواليك.
٣- نمِّي الحاجات دي واكبر فيها وارفض كل صوت بيقارنك بحد.
٤- قول لوالديك (بكل احترام ولباقة): “من فضلكم ما تقارنوش بيني وبين حد. كل حد في الدنيا دي مختلف عن الآخر.. كل حد عنده ذكاءات وقدرات غير التاني. وأنا هاعيش نفسي مش حد تاني .. هاجتهد وهانجح وهاكون شاطر في اللي بحبه”.
لو انت أب أو أم:
١- من فضلك بلاش تقارن تاني .. كفاية.
٢- افتكر لما والديك كانوا بيقارنوا بينك وبين حد تاني.
٣- استبدل المقارنات بتشجيعات.
المقارنة غالبًا حاجة مش عادلة لأنهم بنسبة كبيرة هيكونوا مختلفين عن بعض في حاجات كتير في إمكانياتهم .. وأعتقد إنه هيكون ظلم جداً المقارنة بين.. سمكة وغزال في الجري على الرمال!
اعده لكم: إفرايم عدلي – Nour.Academy
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
المراجع
- نظرية الذكاءات.
- الذكاءات المتعددة فى القيادة والعمل EveryLeader.net.