اصعب سنين الجواز!

صرح رئيس الجهاز المركزي للتعبئة العامة والإحصاء في مداخلة هاتفية لواحد من أكبر البرامج التليفزيونية أن “فى مصر يحدث كل ساعة ١٠٦ حالة زواج، وفى الشهر ٣٠٩٠٠حالة، أما حالات الطلاق فتحدث حالة طلاق واحدة كل ٢ دقيقة و ٢٠ ثانية، وفى الساعة ٢٧ حالة، أما اليوم ٦٥١ حالة، وأكثر من ٧٠٠٠ حالة طلاق فى الشهر”

والمفاجأة أن أعلى نسب الطلاق تتم بين اعمار ٣٠ لـ ٣٥ سنة

وأعلى نسبة زواج تحدث بين اعمار ٢٠ لـ ٢٥ سنة

يعني في جوازات بتستمر ١٠ سنين وتنتهي وجوازات تنتهي في أقل من ١٠ سنين

طيب كام مرة سمعتي “هي بس اول سنة جواز بتبقى صعبة، بعد كده بتاخدوا على بعض”

طيب والإحصائيات اللي فوق دي بتقول غير كده ليه؟

الناس دي مخدتش على بعض ليه؟

لا واللذيذ بقي مصطلح The seventh year itch اللي بيستخدموا كثير من المعالجين النفسيين واتعمل فيلم واستخدم في أكثر من مرجع للعلاقات

ملخص المصطلح ده ان بعد ٧ سنين في أي علاقة طبيعي تشعر بالإحباط والحزن وعدم الرضا

فأنت إذا عديت سابع سنة بسلام

أنت الآن بطل وقد نجوت بسفينة زواجك لبر الأمان!

طيب يا جماعة ما الناس اللي فوق عدت الـ ٧ والـ ٨ والـ ٩ ومكملوش برضوا 😔

حالة عدم الرضا الزواجي للأسف في كل بيت مصري، أوروبي، شرقي، غربي

دي حالة إنسانية

اتنين مختلفين تمامًا من خلفيات وبيئات مختلفة، زرع مختلف لبيوت بظروف مختلفة عايشين تحت سقف بيت واحد بيتحدوا روتين الحياة وبيصارعوا مع المسئوليات

تغلبهم أحيانًا مغريات العالم في الثبات

تغلبهم أكثر صفة الأنانية

يقف كل واحد منهم على طرف المركب منتظر الأخر يجدف

واحنا شاطرين اووووي نرمي اللوم على بعض ومش هلوم طرف عن طرف لأن الحقيقة دي طبيعتنا البشرية منذ بداية الخليقة

آدم رمى ذنب الخطيئة على حواء و هي رمته على الحية

التنصل من مسئولية الفشل عملية سهلة ومعتادة عند البشر

ولكن السؤال هنا؟ اللي كمل ده عمل إيه؟ اللي راضي وسعيد في زواجه.. عملها ازاي؟

وقفت في يوم امام سيدة تقاربنى في العمر في إحدى صالونات السيدات في دردشة حريمي لطيفة سألتني السؤال المعتاد لو رجع بيكي الزمن تتجوزي نفس الراجل؟” وهي مبتسمة ومستنية الرد الكليشيه اللي هقوله واللي بتقوله كل ست

بس انا اخدت ثانيتين فقط لا اكثر ولقيتني بقولها “تصدقي آه هتجوزه هو هو”

قالتلي “انتي حالة استثنائية!!!”

الحقيقة محبط جدًا انك تبقى عكس التيار ومحبط اكثر انك متقدرش تصرح بـ ده للعلن وزي ما يكون حالة عدم الرضا هي اللي لازم تسود وحالة رفض العيشة واللي عايشينها والتذمر عليها هي السائد ومحكمة الأسرة إدراجها لازم تكون مليئة بالملفات

الموضوع اخد مني ايام وايام تحليل شخصي مع نفسي احب اشارككم بيه 

مطبات الزواج مطبات صحية جدًا، الاختلاف ده عامل زي الفيتامينات اللي بتقوى عضلة العلاقة

🍀 لو انت او انتِ مطلعتش من كل خلاف بعضلة اقوى.. بحب اكبر وبتفهم للاختلاف بشكل واضح.. يبقى انت بتاخد مسكن وهيجي في يوم من الايام المسكنات مش هتعمل حاجة وجسمك كله هيثور ضدك.. وعدد سنين الجواز ميبقاش ليها اي قيمة قدام الآلم اللي جوا كل واحد فيكم

🍀 لو تكبرت انك تتعلم وتشتغل على العلاقة دي بحجة انك تمام وزي الفل متلومش غير نفسك في الآخر

🍀 طلب مساعدة متخصصين مش عيب ولا حرام، استثمر في علاقتك لان هو ده الكنز الحقيقي الدائم

🍀 جددوا عهد الحب دائمًا، اغنوا بعض بالكلمات اللينة والطيبة، حنوا على بعض في الأوقات الصعبة

🍀 بادر .. بادر بالحنية، بادر بالتجديف لبر الأمان.. الشجاع هو المبادر

🍀 الكرامة عكسها الزل مش الحب.. الحب عكسه الكراهية.. ادي حب بدون مقابل لأن ده لا يتنافى مع كرامتك في العلاقة

🍀 لا تقارن شريكك او شريكتك بأحد ايًا كان.. كل واحد منكم نموذج فريد يحتاج لمعاملة خاصة

🍀 اعرف لغة حب شريكك او شريكتك واعتذر عن الوقت الضائع في إعطاء حب غير مفهوم

🍀 كُن لها مكان أمن و كوني له مكان أمن.. الأمان هو القبول بدون أحكام، قبول الضعف قبل القوة

🍀 انتم الاصحاب الانتيم لبعض.. سركم واحد، فريق واحد بهدف واحد

🍀 لا تفترض أو تتوقع ولا تقذف إلى الاستنتاجات.. من اخطر ما يهدد العلاقات هو “أخطاء التفكير”.. فأنا اعلم كل شئ وافسر كل شئ وأسمع ما لا ينطق وأرى في عينك ما لا تقول.. فأنا حاوي ومخاوي وذكي جدًا بفهمها وهي طايرة.. ارجوك وارجوكي اقفش نفسك وانت بتفكر تفكير خاطئ.. لا تفترض ما لا تسمعه من شريكك

🍀 دخول أطراف بينكم (غير حيادين) أمر يجعل الخلاف في غاية الصعوبة.. ارجوكم حاوطوا انفسكم بأشخاص تؤمن بوجود زواج ناجح وتؤمن بعمار البيوت وترميم العلاقات.. تدفعك للأمام أنت وشريك حياتك

🍀 رحلة الزواج وتكوين الاسرة تستدعي وجود طرفين يغلب عليهم العطاء والشجاعة والتضحية.. لو مش هتقدر تدي وتحتوى ابنك الأكبر (شريك حياتك) فماذا ستفعل في ابناءك الآخرين

🍀 كلمات يجب ان تضعها في ميدالية مفتاح البيت (الحب، العطاء، الغفران، التضحية، الشركة، الصداقة، الانتماء، والقبول)

واخيرًا وليس اخرًا..
لا توجد سنين زواج صعبة واخرى سهلة.. ولكن يوجد ثنائي يرفض الفشل وثنائي يستسهل طرق ابواب اخرى

كتبته استاذة/ انجيل مراد – مدربة تربية
اخصائي ارشاد نفسي واسري، وتعديل سلوك اطفال ومراهقين

لتستمتع بزواج ناجح وسعيد بحق، وعلاقة ناضجة وممتعة مع شريك حياتك كل يوم، رغم الظروف
اشترك معانا فى كورس الزواج الناجح – من هنا

انتقل إلى أعلى