تصدقوا الجملة على وداني غريبة 🤨
هي اسمها اللي يضربك اضربه
طول عمري بسمعها كده
وافتكر زمان اني اتعاقبت عقاب شديد من ابويا لما معرفتش اخد حقي من بنت ضربتني!
الحقيقة لما بقيت أم حسيت بغضب أبويا
طبعًا بنته جاية مضروبة ومش عارفة تاخد حقها
فـ بالمعتقدات الموروثة “انا اصنف طفلة خايبة وضعيفة”
هل ده هيبقى مقبول من أسرتي؟ طبعًا لأ
طيب انا عايزة ابني شجاع، قوي 💪🏻، يدافع عن نفسه وبدل ما يخاف من اللي قدامه لا ده اللي قدامه يخاف منه!!
معادلة صعبة 😱
طيب أعمل إيه؟ اقولهاله إزاي؟ 🤔
لو جالي متخربش، معضوض، مضروب
اسكت؟! اشتكي؟! اقوله خد حقك
تعالوا سوا نشوف نتصرف إزاي 🧐
نفسيًا الطفل لازم يعرف ياخد حقه ويأمن حدوده ويعرف أن جسمه خط احمر محدش يلمسه او يؤذيه وإلا اصبح طفل ضعيف مش قادر يعمل حدود لجسمه.
يعني لما اجي اقوله محدش يلمس المناطق الخاصة بس مسموح تضرب عادي!!! يحصل عنده تشوه في المعتقد وتشكيك.
يبقى رقم،
(١) لازم أكد على ان جسمك غالي.
(٢) مش من حق حد ايًا كان يخترق حدودك ويلمسك بأي شكل مؤذي.
(٣) انت كائن ليك كل الاحترام من الصغير والكبير وزي ما انت بتدي احترام لازم تستقبله.
(٤) اللي ضرب ده غلطان وده فعل غير مقبول.
طيب تمام 🤝 اتفقنا أعمل إيه بقى يا ماما لما حد يضربني
* الجأ لحد اكبر مني يشوف المشكلة ويستوجب على الطرف الآخر الاعتذار.
طيب و لو اتكرر
* اللي قدامي لازم يعرف اني مش ضعيف ولازم يحترمني مش يخاف مني، هنبهه بنبرة حازمة انه مش مقبول تقرب مني أو تلمسني وصوتي يكون عالي وفي نغمة رفض وغضب.
ولو اتكرر
* بأيدي ابعده عن ديرتي. . دايرة جسمي بحددها لما بفرد دراعي وفي مستوى دراعي مش هسمح لحد يقرب. هبعده بأيدي واقرر نبرة صوتي الحادة .
👈 الرسايل اللي محتاج الطفل يصدقها عن نفسه وينقلها لأقرانه:
١- أنا مش ضعيف.
٢- أنا قوي بعقلي مش عضلاتي.
٣- أنا ليا احترامي لاني ببادر بالاحترام.
٤- العنف مش هو الحل ، العنف وسيلة الضعفاء.
٥- العنف هيجيب عنف.
٦- أنا ممكن أذي اللي قصادي جسديًا بدون قصد واتسبب في كارثة بدل حل المشكلة.
✅ دوري أساعد ابني من عمر الحضانة أصول الدفاع عن نفسه، واصول الدفاع متفقة عليها من الأهل.. يعني مينفعش أنا اقول منردش الضرب بضرب وبابا يقول اللي يضربك اضربه!!
✅ دوري أوجهه واغرس جواه أن العنف فعل غير مقبول اجتماعيًا وأخلاقيًا ودينيًا وقانونيًا.
✅ دوري اعرفه توابع الفعل ده ممكن توصل لإيه؟
✅ دوري انمي فيه قيم الاحترام المتبادل والهدوء في التعامل والحزم عند الغلط والعفو عند المقدرة.