قلل الخلافات واقبل الاختلافات

نقط أساسية محتاج انت وشريك حياتك تتفقوا عليها وتبذلوا مجهود عشان تقدروا تحققوا نسبة كبيرة منها، فـ نقلل الخلافات ونقبل الاختلافات?

أ (أحترم)

الاحترام المتبادل بين الطرفين، احترام قدام الناس وبينكم وبين بعض، نرفض الإهانة أو التقليل وكل واحد منكم يحط النقطة دي قدامه قبل أي نقاش أو تصرف بينه وبين شريكه.. الاحترام يخلق الحب والمودة من غيره الحب يتبخر.

أ (أتفق)

لازم تتفقوا وتوصلوا لنقطة ترضيكم انتم الاتنين، تتفقوا على كل بنود في حياتكم.

تربية الأولاد (للاشتراك فى كورسات احترافية متخصصة فى التربية – اضغط هنا)، الاتفاقات المادية، الاتفاقات الإجتماعية.

كل ما يقف قدامكم موضوع تقرروا ما يتقفلش غير لما تتفقوا عليه.. انتم فريق واحد فيه لاعبين مش لاعب قصاد لاعب وهدف كل واحد منهم الفوز على التاني.

أ (أعبر)

انتهز كل فرصة تقدر تعبر فيها عن مشاعرك و متكسلش وتفوتها، كل مناسبة وبأصغر الحاجات.

احنا كبشر بنحتاج دايمًا نفتكر أننا محبوبين من غير شروط وأننا مقبولين وأننا مهمين بالكلام الحلو والهدايا اللي في غير ميعادها الرسايل القصيرة والطبطبة.

أ (أشارك)

البيت ميقومش غير بعمودين مش عمود واحد، الجواز هو شركة.. شارك مشاعرك وافكارك بثقة لأنه هو ده المكان الآمن اللي يحتوي مشاركتك
مشاركتك أنت أو شريك حياتك مفيش حد منكم هيستخدمها في يوم ضد التانى.

أ (أذاكر وأبحث)

الجواز أو الشركة لازم لها دراسة وبحث، شئ جديد داخلين عليه وكيان جديد بكل تفاصيله ومعاك شريك محتاج انك تفهمه.

الكيان ده يقوم ازاى.. دور كل طرف إيه.. وقعت وفشلت قوم دور وذاكر تاني واسأل متخصص واستشير.. متكسلش ومتملش انك كل يوم تتعلم وتقع وتقوم.

أ (اختار)

دورك أنت و شريكك بعد الاتفاق والاحترام اللي بينكم انكم تختاروا دواير صحية حواليكم.. دواير تقضوا معاهم وقت صحي وتملوا اوقات بعض بطاقة إيجابية.. دواير تكون افكارها ومعاييرها مناسبة لكيانك وبيتك وشركتك.. دواير تبني متهدش.

ت (تواصل)

كل اللي فوق مش هيتحقق لو مفيش تواصل حقيقي بينكم وبين بعض، والنقطة دي من أهم النقط تدور ازاي تعملها.

– ازاي تسمع قبل ما تدور ازاي تتسمع.
– ازاي تعبر عن اللي جواك بطريقة متأذيش اللي قدامك.
– تقدر قيمة الوقت اللي بتقضوه سوا.

للتواصل بنجاح وفاعلية في كل مكان، والاستمتاع بعلاقات أفضل في البيت والعمل..
اشترك الآن مجانًا فى كورس “مهارات التواصل” على منصة نور – من هنا

ت (توزيع)

توزيع الأدوار والاتفاق عليها، كل واحد فيكم واخد مكانه الصح اللي يكمل بيه دور التاني.

وعلى رأي المثل القفة أم ودنين يشيلوها اتنين.

متستناش اللي قدامك يقدم كل اللي عنده وتستنزف طاقته فيقع منك.

وهو / هي كمان يقدر دورك ويشجعك تقوم بيه بحب وصبر.

محدش يقلل من دور حد.

ت (توقعات)

بوظت حياتنا التوقعات.. انزل بسقف توقعاتك تنجو بحياتك.

اللي قدامي مش قارئ الكف ولا مراتك قارئة الفنجان (الله يمسيك بالخير يا عبد الحليم).

هنحتاج عبد الحليم النقطة الجاية متستعجلوش.

المهم،،، جملة كان لازم يعرف وكانت لازم تفهم أو توقعت منه يعمل كده واستنيتها تعمل كده.. والله غلط.

هنرجع للتواصل ونقول مين قالِك انه كان المفروض يعمل ومين قالَك أن توقعاتك كانت لازم تتحقق.. رفقًا.

ت (تغيير الروتين)

ااااااه بقى يا عبد الحليم.. مش عيب يا بشمهندس تاخد المدام لاقرب بتاع عصير تشربوا شوب الفخفخينا من غير احباب الله.

والله ما هتبقوا انانيين أبدًا.

كلنا حرفيًا بلا استثناء الطبيعة البشرية بيجيلها وقت أو أوقات كتير وطاقتها تبقى صفر.

روتين وشغل وعجلة الحياة وضغط المسئوليات.. عاوزين نشيل الفيشة.

طيب ازاي؟؟

تتفقوا سوا

تتفقوا على وقت ليكم (مع بعض) ووقت لكل حد فيكم لوحده نشد الفيشة ونجدد الطاقة

ايًا كان حجم الوقت أو المكان المهم تتفقوا إيه اللي ممكن يجدد طاقتنا ومتكسلوش تغيروا الروتين

ربنا يدينا جميعًا حكمة وصبر نقدر نحقق كل ده وننجو بسفينتنا لبر الأمان ونحصد ثمر تعبنا وتضحياتنا ومجهودنا في الشركة اللي بنا.

كتبته استاذة/ انجيل مراد – مدربة تربية
اخصائي ارشاد نفسي واسري، اخصائي تعديل سلوك اطفال ومراهقين – نور دوت اكاديمى.

لتستمتع بزواج ناجح وسعيد بحق، وعلاقة ناضجة وممتعة مع شريك حياتك كل يوم، رغم الظروف..
اشترك فى كورس “الزواج الناجح” على منصة نور – من هنا

انتقل إلى أعلى