كنت قاعدة مع ناس اعرفهم وعارفين طبيعة علاقتي ببنتي وازاي بحاول اعاملها كبني آدم علي اد ما اقدر..
أنا: بيا خدي كباية اللبن بتاعتك اشربيها..
بيا: بصت للكباية ومارضيتش تأخذها وكملت لعب..
محاولة تاني مني.. بيا كباية اللبن بتاعتك خدي..
هوب غضبت.. زقت الكباية من ايدي كانت هاتتكب ووشها اتعصب.. وبصت الناحية التانية وماسكة لعبتها…
هنا في احتمالين رد فعل.. اما انا كمان هاخد من رد فعلها واتعصب ✋ وهوب طب مفيش لبن خلاص ووش مقلوب..
أو مشهد تاني، طيب ممكن لما تحبي تشربي اللبن اهو موجود قدامك لما تخلصي لعب..
بس لقيت اللي قاعدين هاه يا بتاعة التربية شايفة البنت بتتعصب ازاي.. ورينا بقى هتعملي ايه؟.. يانهار ابيض دى كانت هتكب اللبن، وزقته بغيظ.. امال فين بقى اللى تاعبة نفسك فيه..
طبعا تنحت شوية ? اتهزيت من رد فعل الناس..
على اساس ان بيا عروسة ماريونت بحركها زي ما انا عايزة ممنوع تغضب، ممنوع تعبر، ممنوع تكون عكس ما متعارف عليه مني أو من الشكل المجتمعي العام..
بس الحقيقه أن الطفل شخص متفرد ليه كيان ومشاعر وموود.. ايوه هو المود اللى بيزهق ويمل كده زينا.. أصله بني ادم عادي يعني..
اشترك فى كورس التربية الإيجابية ٢ وتعلم كيف تواجه مشاكل أولادك اليومية
الطفل بيفرح ويحزن ويخاف ويقلق ويغضب.. وحقه جدًا يعبر بس لو اتكتم في مرة عن تعبيره واتقاله ازاي يا حبيبي عيب كدا انت جميل متتعصبش او انت شاطر متزعلش ✋ كده بنلغي كيانه وتعبيره المهم عن نفسه اللي بيكون شخصيته.. ويتحول لحد تاني غير نفسه ويحبط من مشاعره الطبيعية اللي بتحسسه بالذنب لأنها بتضايق اللي حواليه ويكبر بيحاول يتصنع مشاعره ارضاءً لغيره..
الطفل محتاج اتفهم مشاعره واوصفهاله واساعده جدًا يعبر بطريقة تخليه يحس انه افضل واشرحله احساسه اللي ممكن الناس مخضوضة منه ومش فهماه.. واحسسه انه بني آدم من حقه يحس بكل المشاعر الإنسانية ومن حقه احترمها..